На другім паверсе гродзенскай крамы рамесных вырабаў і падарункаў «Лёля» праходзіць выстава старых калядных і навагодніх паштовак і анёлаў з розных матэрыялаў. Паштоўкі для выставы прапанавала гродзенская калекцыянерка Ларыса Ліс.
«Ідэя была сабраць выставу анёлкаў, вырабленых рознымі майстрамі. Тэма анёлаў блізкая многім мастакам, і заўсёды кранае нашыя сэрцы, асабліва ў калядны час», — каментуе Дар’я Фядотава, гаспадыня крамы «Лёля».
На выставе — анёлкі ад розных гродзенскіх майстроў і мастакоў з іншых гарадоў Беларусі. Ёсць саламяныя, драўляныя і нават анёлкі-пернічкі, міні-анёлачкі. У куце стаіць святочная ялінка, завешаная навагоднімі цацкамі ручной работы.
Але сустракае наведнікаў выставы стэнд са старымі навагоднімі і каляднымі паштоўкамі ад гродзенскай калекцыянеркі паштовак Ларысы Ліс.
«Паштовачкі як дарэвалюцыйныя так і савецкага часу, мясцовыя і замежныя. Многія з іх падпісаныя, вельмі цікава пабачыць, як людзі віншавалі адно-аднаго на працягу такога доўгага часу, далучыцца да гэтай шматгадовай плыні пажаданняў і цеплыні», — тлумачыць Дар’я.
Калекцыянерка Ларыса Ліс збірае паштоўкі з самага дзяцінства, а цяпер называе сябе папулярызатаркай паштовак. Для яе важна не толькі калекцыянаваць, а і дзяліцца сваімі набыткамі з людзьмі, паказываць, зацікаўліваць. Таму спадарыня Ларыса ахвотна і часта ўдзельнічае ў выставах, часам ладзіць невялічкія ўласныя, як цяпер у краме «Лёля». З Дашай Фядотавай яны пазнаёміліся два гады таму, на адкрыцці крамы, і неўзабаве наладзілі там выставу паштовак, прысвечаную Дню маці.
[irp posts="99 576″ name=""Бо люблю". Навошта сямʼя гарадзенцаў трымае непрыбытковую краму беларускага хэндмэйду"]
Самая старая паштоўка на каляднай выставе — 1902 года. Тады заўсёды падпісвалі дату, калі паштоўка была падораная. А калі дата не стаіць, час можна вызначыць па паштовым штэмпелі. Час і месца паходжання калекцыянерка можа вызначыць нават па якасці паперы і стылі малюнкаў. На гэтай выставе не ставілі мэту паказаць паштоўкі за ўсе гады. Гэтым разам на калядную выставу адмыслова падбіралі асобнікі з выявамі сям'і, дзетак, каб нагадаць пра гэтыя каштоўнасці. «Мы вельмі даўно адышлі ад паштовачак, на якіх сям’я», — з сумам заўважае калекцыянерка.
Ларыса Ліс расказала, што даўней на калядных і навагодніх паштоўках вельмі любілі змяшчаць выяву свінні. Гэта аніяк не звязана з усходнім календаром — свіння лічылася сімвалам дастатку, якога людзі хацелі б пажадаць адзін аднаму ў новым годзе.
[irp posts="66 145″ name="Куміры тэатру і кіно пад адным дахам: выстава з прыватнай калекцыі гродзенкі адкрылася ў бібліятэцы"]
Наогул самая старая паштоўка ў калекцыі спадарыні Ларысы — 1884 года. «Калі кажу пра гэта на выставе, кладу лупу, каб яны бачылі год, у людзей у галаве не змяшчаецца, пытаюць: „А што, тады былі паштоўкі?“».
Наведаць выставу ў краме «Лёля» можна да 7 студзеня. Час працы: аўторак — пятніца з 10.00 да 19.00; субота, нядзеля — з 11.00 да 17.00, панядзелак — выхадны.
Гродзенскіх школьнікаў прывялі ў ізалятар часовага ўтрымання. Гэта адбылося ў межах экскурсіі, паведаміла прэс-служба Упраўлення…
У цэнтры Гродна дабудоўваюць офіс IT-кампаніі “Афранс”. Ён будзе складацца з двух будынкаў на вуліцы…
Атрымаць тавары з-за мяжы павінна была рэлігійная місія Дабрачыннага каталіцкага таварыства «Карытас» Гродзенскай дыяцэзіі. Памежнікі…
На вуліцы 17 верасня, 59/3 можна набыць кватэру ў цалкам адрэстаўраваным будынку 1925 года пабудовы.…
У Гродне пачаўся рост цэн за арэнду кватэры на майскія святы. Гэта звязваюць з плынню…
У мікрараёне “Зарыца-1” плануюць пабудаваць блакаваныя жылыя дамы. Участак выставілі на аўкцыён, паведаміў Гродзенскі цэнтр…