Сёлета «Сусветнае прэс-фота — 2019» — сусветна вядомы праект — ужо другі раз пакажуць у Гродне. Адкрыццё выставы адбудзецца 8 жніўня 2019 года, а 19:00 у «Цэнтры гарадскога жыцця». У праграме — экскурсія ад куратаркі «Сусветнага прэс-фота — 2019» Санэ Схім ван дэр Люф (Нідэрланды). Выстава будзе экспанавацца да 29 жніўня.

Гісторыі, якія маюць значэнне: «Сусветнае прэс-фота – 2019» (World Press Photo) пакажуць у Гродне
Марка Гўаляццыні, Італія, Contrasto. Хлопчык-сірата ідзе ўздоўж мура, на якім намаляваныя супрацьтанкавыя гранатамёты, у горадзе Боль (Чад).
Выстава паказвае вынікі штогадовага конкурсу «Сусветнае прэс-фота», які сёлета ладзіцца 62-гі раз. Конкурс адзначае прафесійных фатографаў за найлепшыя кадры — асобныя здымкі або серыі, — зробленыя імі на патрэбу візуальнай журналістыкі ў папярэднім годзе.

Сёлета 4738 фатографаў са 129 краінаў падалі на конкурс 78 801 фатаграфію. Візуальныя гісторыі ацэньваюцца паводле наступнага крытэру — дакладнае, сумленнае і пераканаўчае адлюстраванне нашага свету. Працы мусяць адпавядаць нормам этыкі, а фота пераможцаў праходзяць строгую праверку на праўдзівасць. Гэта гарантуе дакументальную дакладнасць сцэнаў, сведкам якіх зрабіўся фатограф.

Гісторыі, якія маюць значэнне: «Сусветнае прэс-фота – 2019» (World Press Photo) пакажуць у Гродне
Брэнт Стэртан, ПАР, Getty Images для National Geographic. Крэчатаў навязваюць да жэрдак у гадавальніку каля Абу-Дабі (Аб'яднаныя Арабскія Эміраты).
У журы конкурсу ўваходзяць прызнаныя прафесіяналы фотажурналістыкі. Склад журы мяняецца кожны год.

Усё пачала ў 1955 годзе група галандскіх фатографаў, арганізаваўшы міжнародны конкурс («Сусветнае прэс-фота»), каб паказаць свае працы аўдыторыі па ўсёй планеце. З таго часу конкурс развіўся ў самае прэстыжнае на свеце спаборніцтва фатографаў, а місія пашырылася. Штогод выстава экспануецца больш чым у 100 гарадах 45 краінаў. Выстава прэзентуе гісторыі, што змушаюць людзей спыніцца, адчуць, задумацца і пачаць дзейнічаць. Такім чынам конкурс ушаноўвае найлепшае ў журналістыцы і лічбавым сторытэлінгу.

Гісторыі, якія маюць значэнне: «Сусветнае прэс-фота – 2019» (World Press Photo) пакажуць у Гродне
Алівія Гэрыс, Вялікая Брытанія. 25 траўня Ірландыя на рэферэндуме значнаю большасцю галасоў скасавала закон пра спароны, які быў адным з найбольш строгіх у свеце. Жанчыны скручваюць тканіну перад банерам, створаным мастачкай Эліс Магэр на Міжнародным арт-фестывалі «Eva» ў Лімэрыку
Ёсць адчувальная патрэба ў выявах і гісторыях, вартых даверу, і высакаякасныя рэпартажы на гэтай выставе даюць важныя веды пра наш свет. Часам гэта прыгожыя выявы, а часам неабходна паказаць цяжкія гісторыі, але ўсе яны дакладныя і маюць значэнне.

У 2019 годзе выставу «Сусветнае прэс-фота» ўжо шосты раз прымае Беларусь (апошнія чатыры гады афіцыйным партнёрам праекту выступае культурніцка-адукацыйны цэнтр ЦЭХ). Экспазіцыя арганізаваная ў партнёрстве з «Цэнтрам гарадскога жыцця» (Гродна) пры фінансавай падтрымцы амбасады Каралеўства Нідэрландаў у Варшаве.

Гісторыі, якія маюць значэнне: «Сусветнае прэс-фота – 2019» (World Press Photo) пакажуць у Гродне
Джон Мур, ЗША, Getty Images. Гандураская дзяўчынка Янэля Санчэс плача, калі яе і ейную маці Сандру Санчэс 12 чэрвеня арыштоўваюць памежнікі ЗША ў МакАлене (штат Тэхас).
Экспазіцыя будзе даступная з 8 да 29 жніўня 2019 года па адрасе: «Цэнтр гарадскога жыцця», вул. Кірава, 3, 12:00—20:00 штодня, уваход вольны.