Маме Аляксея Шоты ў дзяжурнай частцы паведамілі, што ён цяпер знаходзіцца ў Ленінскім РАУС. Па якім артыкуле ён затрыманы, ёй не сказалі. Зараз на здымнай кватэры Аляксея ідзе агляд.

Паводле інфармацыі Hrodna.life, у дачыненні да Аляксея ідзе разбіральніцтва па арт. 19. 11 КаАП «Распаўсюд, выраб, захоўванне, перавозка інфармацыйнай прадукцыі, якая змяшчае заклікі да экстрэмісцкай дзейнасці або прапагандуе такую дзейнасць». Ён паспеў паведаміць, што яго затрымалі за публікацыю на сайце аднаго з Telegram-каналаў, прызнаных экстрэмісцкім.

Як затрымалі галоўнага рэдактара?

Аляксея затрымалі, калі ён выйшаў з кватэры забраць у былой жонкі Іны электрадухоўку, распавяла дзяўчына Hrodna.life. З белага мікрааўтобуса, які стаяў побач, выйшла некалькі мужчын. «Сталі пытацца: «Гэта ваша? Куды несяце? А потым пад руку, і ў бус, і павезлі», — сказала дзяўчына. Спачатку яго звезлі, а потым вярнулі дадому па ключы.

Дома правялі агляд

Каля 15.00 Аляксея павезлі на здымную кватэру — верагодна, правесці агляд. У сілавікоў ёсць ордэр на гэтыя дзеянні.

Дома ў галоўнага рэдактара Hrodna.life Аляксея Шоты прайшоў агляд
Аляксея Шоту павезлі ў белым мікрааўтобусе. Фота: відавочцы

Аляксея могуць затрымаць на 72 гадзіны для забеспячэння яўкі на судовае разбіральніцтва, пракаментаваў Hrodna.life адвакат.

Hrodna.life ужо судзілі па гэтым артыкуле — тады нас аштрафавалі на 12 325 рублёў.

Каля 15.30 міліцыя пацвердзіла затрыманне і адміністрацыйную справу. Адзначым, што відэа загрузілі яшчэ 28 траўня.

 — Падчас маніторынгу сеткі інтэрнэт супрацоўнікамі Ленінскага РАУС г. Гродна выяўлены факт размяшчэння сайтам Hrodna.life інфармацыйнай прадукцыі, прызнанай ва ўстаноўленым парадку экстрэмісцкай, — паведаміў Яўген Дудко, аддзяленні інфармацыі і грамадскіх сувязяў УУС Гродзенскага аблвыканкама.

Дома ў галоўнага рэдактара Hrodna.life Аляксея Шоты прайшоў агляд
Відэа ва УУС загрузілі яшчэ 28 траўня. Скрыншот: Hrodna.life

Чытайце таксама: