Пахаваць на сваім падворку альбо ў лесе побач з домам памерлую хатнюю жывёлу нельга. Гарадскія могілкі прызначаны для пахавання людзей. Што рабіць з памерлым хатнім гадаванцам, паведаміў NewGrodno.
Ці ёсць у Гродне могілкі для жывёлаў?
У Гродне няма могілак для хатніх жывёлаў. Труп хатняга пітомца можна здаць на ўтылізацыю ў ветэрынарную станцыю. Яшчэ адзін варыянт — крэмацыя. Але крэміраваць жывёлу можна толькі ў Мінску.
Цана крэмацыі залежыць ад памераў і вагі жывёлы, а таксама ад віда крэмацыі. Напрыклад, 1 кг крэмацыі ў Sas animal service каштуе 8 рублёў. У ветэрынарнай клініцы «Дзевяць жыццяў» цана за крэмацыю жывёлы ад 80 да 580 рублёў. У кампаніі «Свяча жыцця» паслуга крэмацыі каштуе ад 65 да 160 рублёў.
Танней каштуе агульная крэмацыя — калі ў спецыяльнай печы спальваюць некалькі жывёлаў. Але ў такім выпадку ўладальнікам жывёлы прах не вернуць. Другі варыянт — паслуга індывідуальнай крэмацыі. У такім выпадку прах жывёлы запакуюць у пластыкавы кантэйнер альбо індывідуальны экабокс альбо кулон. Таксама могуць прапанаваць набор «Дрэва памяці», калі з дапамогай праха жывёлы можна вырасціць дрэва.
Чаму нельга хаваць жывёлаў у зямлю?
Паводле Пастановы Савета Міністраў № 758 у Беларусі забаронена хаваць жывёл у зямлю, бо іх трупы могуць распаўсюджваць захворванні небяспечныя для чалавека. Альбо прадукты распада цела могуць патрапіць у вадаёмы і калодзежы.
Напрыклад, узбуджальнік шаленства жывёлы ў глебе можа захоўвацца 2 — 3 месяцы, а сібірскай язвы — 100 гадоў.
За пахаванне жывёлы ў зямлю могуць прыцягнуць да адказнасці і даць штраф ад 30 базавых велічынь (960 рублёў) для індывідуальнага прадпрымальніка і ад 20 да 200 базавых (ад 640 да 6400 рублёў) для юрыдычнай асобы, паводле арт. 16.28 КаАП РБ (Парушэнне патрабаванняў у вобласці ветэрэнарнай дзейнасці).
