У Гродне на прыпынках грамадскага транспарту плануюць усталяваць электронныя табло. Папяровыя расклады таксама абновяць. Якія змены ўнясуць у расклад, паведаміў кіраўнік Гродзенскага гарадскога Аператара пасажырскіх перавозак Вадзім Матусевіч.
![остановка гродно](https://dzh7f5h27xx9q.cloudfront.net/wp-content/uploads/2023/02/a8121c0d6da5cf5bb85bb7978e33cd0a-800x534.jpg)
На прыпынках могуць з’явіцца электронныя табло
На найбольш папулярных прыпынках горада плануюць неўзабаве ўсталяваць электронныя табло. Яны павінны паведамляць аб тым, калі і які аўтобус, тралейбус ці маршрутка прыедуць.
У 2018 годзе на пяці папулярных гродзенскіх прыпынках ужо ўсталявалі мультымедыйныя экраны. Тыя табло ўсталёўвала прыватная фірма з Барысава. У лютым 2023 года яны ўжо не працавалі, бо ўсталёўшчык не выконваў свае абавязкі. Таксама перабоі ў працы табло адбываліся праз змяншэнне колькасці рэкламы.
Чытайце таксама: Зрабіць вандроўкі па горадзе зручнымі: што такое бясшвоўнасць перасоўвання і як яе дасягнуць
Цяпер Аператар пасажырскіх перавозак хоча ўсталяваць новыя экраны самастойна. Зараз прылады тэстуюць, каб яны маглі спраўна працаваць у любы перыяд года.
У папяровыя расклад дададуць інтэрвал маршрутак
У Гродне плануюць змяніць і традыцыйныя расклады на прыпынках. На некаторых акрамя аўтобусаў і тралебусаў у расклад унясуць інтэрвалы руху маршрутак. Гэта будзе датычна найбольш запатрабаваных прыпынкаў і канчатковых.
Фармат раскладаў пры гэтым не зменіцца, хаця не ўсім ён падаецца зручным. У 2020 годзе рэдакцыя Hrodna.life на сайце petitions.by запусціла зварот у Гродзенскі гарвыканкам з просьбай зрабіць табліцы раскладу руху на прыпынках зручнымі. Петыцыю падпісалі больш за 50 чалавек, але гарвыканкам так і не адказаў на яе.
Будуць пераймяноўваць прыпынкі
Сёння ў Гродне 546 прыпынкаў. Адлегаласць паміж імі - 350−800 метраў у шматпавярховых забудовах і 500−1000 метраў у прыватным сектары. Там, дзе гэта трэба, прыпынкі хочуць перайменаваць альбо перанесці.
Чытайце таксама: У Гродне мяняюць расклад транспарту. Што яшчэ варта змяніць, каб ім было зручней карыстацца