Эксперымент па правядзенні дыстанцыйных перадрэйсавых медычных аглядаў кіроўцаў правядуць у Гродзенскай вобласці з 22 студзеня па 22 красавіка 2024 года. Адпаведнае рашэнне прынялі ў Міністэрстве аховы здароўя.
Што будуць правяраць у кіроўцаў
Базай для правядзення эксперымента будуць гродзенская Дзіцячая цэнтральная гарадская паліклініка і кабінет таварыства з абмежаванай адказнасцю «БелСофт Агляд». Аглядаць кіроўцаў будуць праводзіць з выкарыстаннем комплекса «АГЛЯД Плюс».
З дапамогай комплекса медычны супрацоўнік у рэжыме рэальнага часу зможа:
- ідэнтыфікаваць кіроўцу праз дакумент, які пацвярджае асобу;
- апытаць кіроўцу на наяўнасць скаргаў;
- з дапамогай убудаваных электронных прыладаў вымяраць тэмпературу цела, пульс і артэрыяльны ціск;
- акрэсліць канцэнтрацыю параў алкаголю ў выдыхаемым паветры.
Па выніках агляда медык прыме рашэнне аб допуску кіроўцы да працы.
Што за сістэма «АГЛЯД Плюс»
Сістэму «АГЛЯД Плюс» распрацавалі у філіяле «Камертон» адкрытага акцыянернага таварыства «Інтэграл» у 2021 годзе. Асноўныя спажыўцы сістэмы — прадпрыемствы, якія займаюцца перавозкамі, каб дыягназаваць стан кіроўцаў перад зменай альбо выездам.
Працэс агляду павінен запісвацца на камеру. «Гэта важна ў выпадку спрэчных сітуацый. Дадзеныя перадаюцца і захоўваюцца на серверы. Акрамя гэтага, ёсць магчымасць выводзіць вынікі агляду праз sms альбо Telegram», — казаў галоўны інжынер філіяла «Камертон» Аляксей Саўко.
Адзін медычны супрацоўнік зможа дыстанцыйна абслугоўваць да трох комплексаў. Таксама наяўнасць сістэмы выключае ўплыў чалавечага фактара.
