Беларуская кампанія Daloni Coffee выпусціла тэматычны набор дрып-кавы «Смак Радзімы», прысвечаны гарадам Беларусі. У калекцыю ўвайшлі 12 смакаў, частка з якіх прадстаўлена манасартамі, а для абласных цэнтраў і Мінска распрацавалі аўтарскія кававыя сумесі.
У набор уключылі смакі, прысвечаныя Мінску, Брэсту, Гродну, Віцебску, Магілёву, Гомелю, Бабруйску, Лідзе, Пінску, Лунінцу, Полацку, Рагачову і Глыбокаму.
Пра набор кампанія распавяла ў Threads.
У каментарыях яе прадстаўнікі адзначылі, што не змаглі ўключыць усе гарады адразу. Але калі будзе цікавасць пакупнікоў да іншых мясцін, то там плануюць і другую частку калекцыі з іншымі населенымі пунктамі. Каментатары прасілі, напрыклад, Нарач і Баранавічы.
Асобна ў каментарыях кампанія распавяла пра распрацоўку дрыпа для Ліды. Для яго стварылі спецыяльную ферментацыю з выкарыстаннем нямецкага хмелю і цёмнага піва. А вось якія на смак іншыя гарады, можна даведацца, пакаштаваўшы «Смак Радзімы».
«Гарадскі» набор каштуе 57 рублёў і ўключае ў сябе 12 дрып-пакетаў.
Таксама Daloni Coffee выпусціла турыстычны сэт разам з праектам Vander Group. У яго ўвайшлі дрып-пакеты і «пашпарт вандроўніка» для паездак па Беларусі. Кошт набора склаў 99 рублёў.
Што такое дрып-кава
Дрып-пакет — гэта кампактны папяровы фільтр з порцыяй меленай кавы. Для прыгатавання напою не патрабуецца кававарка ці турка — дастаткова заліць каву гарачай вадой. У кожным пакеце знаходзіцца каля 12 грамаў кавы. Вытворцы выкарыстоўваюць азотную ўпакоўку, дзякуючы якой прадукт даўжэй захоўвае свежасць і водар. Тэрмін прыдатнасці набора складае шэсць месяцаў.
Тэхналогія дрып-кавы з’явілася ў Японіі ў 1990-х гадах як альтэрнатыва звычайным кававым паціскам. Пазней канструкцыю ўдасканалілі: фільтр сталі замацоўваць над кубкам, каб вада праходзіла праз пласт меленай кавы.
Што за кампанія Daloni Coffee
Кампанія Daloni Coffee пачала працу ў 2015 годзе. Яе заснаваў Дзмітрый Кіслякоў, які да таго моманту ўжо больш за 13 гадоў займаўся вытворчасцю кавы. Першапачаткова брэнд называўся Coffee Everyday і выпускаў пяць кававых блендаў, названых па днях тыдня — ад панядзелка да пятніцы. Пазней кампанія пашырыла асартымент і засяродзілася на specialty coffee і манасартах арабікі.
У 2023 годзе кампанія правяла рэбрэндынг і афіцыйна стала называцца Daloni Coffee. Назва звязана са словам «далоні». «Мы выбралі слова „Далоні“ для нашага брэнда, таму што лічым, што далоні людзей — гэта найважнейшы элемент кававага шляху ад ягады да кубка», — напісана на сайце кампаніі.
