Спартыўны клуб Titan на вуліцы Лідскай, 1 будзе працаваць кругласутачна – опцыя стане даступная з 10 ліпеня 2026 года. У гонар абнаўлення фармату клуб уладкоўвае «ноч адчыненых дзвярэй».
У сваім Instagram прадстаўнікі спартыўнага клуба адзначаюць: Titan — «першая зала ў рэгіёне Гродна, якая працуе ў такім рэжыме», маючы на ўвазе кругласутачны фармат працы.
“Ноч адчыненых дзвярэй” запланавана на 10 ліпеня. Мерапрыемства пачнецца ў 22:00, а скончыцца а 7 раніцы. У гэты час клуб можна наведаць бясплатна, а таксама набыць начны безліміт з 50% зніжкай – у такім выпадку абанемент абыдзецца ў 24,5 руб.
Уначы таксама будуць даступныя салярый і саўна. У начную змену будуць працаваць і адміністратары. А вось трэнераў, як і групавых трэніровак, не будзе.
Клуб Titan пачаў працу ў 2018 годзе – яго сваімі сіламі адкрылі гродзенцы Давід і Аляксандр. Асноўным і на той момант адзіным напрамкам выбралі кросфіт. За некалькі месяцаў працы ўдалося сабраць каля сотні наведвальнікаў, які аддавалі перавагу дастаткова сур’ёзным фізічным нагрузкам.
За гады працы клуб пашырыў свае кірункі. З’явіўся фіт файт (функцыянальная трэніроўка, накіраваная на сілу ўдарных рухаў), муай-тай (тайскі бокс), флекс (трэніроўка, накіраваная на ўмацаванне глыбіннай мускулатуры і мышцаў), а таксама пілатэс.
Чытайце таксама: У Гродне адкрылася новая пляцоўка для тэніса – гараджанам прапануюць і пагуляць, і зрабіць фотасесію
