У Гродне жанчына звярнулася ў адзін з салонаў прыгажосці – хацела зрабіць вертыкальную завіўку валасоў. Адразу пасля працэдуры завіток трымаўся дрэнна, а затым сышоў зусім. Тады гродзенка падала ў суд на салон прыгажосці за няякасна аказаную паслугу.
Завіўка абышлася гродзенцы ў 297 руб., працэдуру завіўкі жанчына рабіла ў лютым. Гарантыю на канчатковы вынік давалі на 6-9 месяцаў. Пасля таго, як завіток распаўся амаль адразу, салон прапанаваў жанчыне паўтарыць працэдуру бясплатна.
Гродзенка адмовілася: не давярала майстру і перажывала за стан валасоў. Высветлілася, што супрацоўнікі салона не папярэдзілі кліентку аб тым, што на якасць завіўкі могуць уплываць гарманальныя прэпараты, якія яна прымала. У далейшым усе гэтыя прэтэнзіі пацвердзіў эксперт.
Грамадскае аб’яднанне па абароне правоў спажыўцоў у інтарэсах кліенткі падало пазоў на салон прыгажосці ў суд Ленінскага раёна Гродна. Суд стаў на бок гродзенкі.
З салона спагналі 297 руб. кошту завіўкі, яшчэ 200 руб. у якасці кампенсацыі маральнай шкоды. Таксама салон прыгажосці выплаціў штраф у амаль 450 руб. і дзяржпошліну (656 руб.). Яшчэ на карысць грамадскага аб’яднання з адказчыка спагналі 3200 руб. выдаткаў.
Салон прыгажосці спрабаваў аспрэчыць рашэнне ў Гродзенскім абласным судзе, але скарга засталася без задавальнення. Рашэнне суда ўступіла ў сілу.
Чытайце таксама: Гродзенская клініка ўстанавіла надбаўку ў 960% за платную працэдуру — паслугай зацікавіўся МАРГ
