На Вялікай Траецкай хочуць пабудаваць гандлёва-офісны цэнтр, а гарвыканкам прапануе гродзенцам выказаць сваё меркаванне пра гэтыя планы. Наконт меркаванага навабуда для Hrodna.life выказаліся спецыялісты ў гісторыі горада.
Згодна з праектам, паміж дамамі № 11 і 7 на Вялікай Траецкай плануюць паставіць трохпавярховы будынак з гандлёвымі памяшканнямі і офісамі. У гарвыканкаме лічаць, што новы аб’ект павысіць прывабнасць цэнтра горада. Пабудаваць яго збіраюцца за 2018−2019 гады.
Будаваць можна, але не адзін вялікі будынак
Некалькі гадоў таму краязнаўца Ігар Лапеха рабіў макет гэтай вуліцы для музея сінагогі. Там краязнаўца паказаў, як выглядалі раней дамы на месцы будучага гандлёвага цэнтра. Ігар Лапеха лічыць, што трэба падысці да будаўніцтва цэнтра комплексна: даведацца, што будзе ў будучыні са старым кварталам, а таксама вырашыць транспартную праблему.
Каштоўнай з’яўляецца планіроўка месца, таксама трэба захаваць трасіроўку вуліцы Малая Траецкая. Яшчэ важнае пытанне парковачных месцаў. Перад тым як нешта будаваць, трэба загадзя забяспечыць парковачныя месцы для арандатараў і наведвальнікаў".
[irp posts="83 500″ name="Сквер за «тэкстылямі» перажывае апошнюю восень: там пабудуюць офісны цэнтр. Што думаюць гродзенцы?"]
Наконт архітэктурнага аблічча комплексу, краязнаўца лічыць, што гэта адназначна не павінен быць аб’ект на ўсю пляцоўку ад крамы «Лёля» (дом № 7) да офіснага будынка (№ 11).
«Гэта будзе цяжка ўспрымацца на старой вуліцы з архітэктурнага пункта гледжання», — дадаў Лапеха.
Краязнаўца адзначыў, што агулам новы гандлёвы аб’ект на Вялікай Траецкай можа дапамагчы далучыць вуліцу да турыстычнай часткі цэнтру і ажывіць яе. Магчыма, тады гарадскія ўлады таксама адмовяцца ад праекту дубля Вялікай Траецкай.
Сучасная архітэктура ці псеўдагістарычны муляж
Гісторык Мечыслаў Супрон лічыць, што новы будынак павінен быць падобны да суседніх камяніц.
«Гэта месца на Траецкай з’яўляецца пусткай ад часоў Другой сусветнай. На мой погляд, тут не было якой-небудзь цікавай і каштоўнай забудовы, якую было б варта аднавіць. Найбольш лагічным падаецца будаўніцтва на гэтым месцы якога-небудзь будынка, які сваім выглядам максімальна спалучаўся б з суседнімі камянічкамі канца 19 ст.
На Захадзе ў такіх сітуацыях узводзяць суперсучасныя офісныя цэнтры аўтарства знакамітых архітэктараў. У нас жа падобную архітэктурную кампазіцыю не ўмеюць не тое каб праектаваць, але нават капіраваць. Замест яе на вуліцах горада з’яўляюцца штогод прыклады брыдкіх будынкаў. Таму я супраць сучаснага будынка ў выкананні беларускіх архітэктараў. Я за псеўдагістарычны муляж".
Не больш за тры паверхі
Гісторык архітэктуры Ігар Трусаў лічыць, што без праекта пакуль рана нешта казаць і прапаноўваць.
«Будаваць там можна, але не вышэй трох паверхаў. Прамой забароны на будаўніцтва чагосьці новага няма, тут справа густу праектантаў. Усё будзе залежаць ад гарадской архітэктуры. Але праект пакуль не паказвалі, нават на стадыі эскіза».
