Аляксандр Лукашэнка прызначыў ураджэнца Гродзеншчыны Андрэя Лук’яновіча камандуючым Вайскова-паветранымі сіламі і войскамі супрацьпаветранай абароны Беларусі. Гэта адбылося 13 снежня 2022 года. MOST сабраў факты з біяграфіі новага камандуючага.

Служыў у Бураціі, дачка вучыцца ў Германіі. Што вядома пра новага камандуючага паветранымі сіламі Беларусі
Андрэй Лук’яновіч.

Нарадзіўся ў Смаргоні, а служыў ва Улан-Удэ

Лук’яновіч нарадзіўся ў Смаргоні. Яго бацька памёр, калі Андрэй вучыўся ў першым класе. Яго і дзвюх сясцёр выхоўвала маці.

У 1992 годзе Лук’яновіч скончыў Балашоўскую вышэйшую авіяцыйную вучэльню. Па размеркаванні служыў ва Улан-Удэ [Бурація, Расія — Hrodna.life] у вайскова-транспартнай авіяцыі.

Адпраўляў у Кітай лекі з авіябазы ў Мачулішчах

У 2012 годзе Лук’яновіча прызначылі камандзірам 50-й змяшанай авіяцыйнай базы ў Мачулішчах [Мінскі раён — Hrodna.life]. Ён узначальваў яе да 2022 года.

Падчас пандэміі каранавіруса, зімой 2020 года, Беларусь адпраўляла з гэтай авіябазы лекі, прэпараты, сродкі індывідуальнай абароны, сродкі дэзынфекцыі ў Кітай. Гэтай «аперацыяй» камандаваў Лук’яновіч.

Лётаў на парадах і ўдзельнічаў у УНС

Андрэй Лук’яновіч — вайсковы лётчык-снайпер. Ён мае больш за 4,2 тыс. гадзінаў налёту. Лук’яновіч удзельнічаў у парадах на Дзень Незалежнасці Беларусі 3 ліпеня, падчас якіх лётаў на ІЛ-76.

У лютым 2021 года лётчык удзельнічаў ва Усебеларускім народным сходзе. Тады ён распавядаў пра тое, што беларускія Узброеныя сілы — кампактныя, добра падрыхтаваныя. Акрамя гэтага казаў, што добры стан вайскоўцаў у Беларусі - заслуга Лукашэнкі. Таксама Лук’яновіч дэпутат Мінскага раённага Савета дэпутатаў 28 склікання. Ён прадстаўляў другую Мачулішчанскую выбарчую акругу.

Казаў, што супраць Беларусі развязалі інфармацыйную вайну

Перад уварваннем расійскіх войскаў ва Украіну ў лютым 2022 года Лук’яновіч сказаў, што беларускае войска сумесна з расійскім праводзяць вучэнні. Тады ён паскардзіўся, што падчас іх былі правакацыі з боку Польшчы, Літвы і Украіны, а супраць Беларусі развязалі інфармацыйную вайну.

Служыў у Бураціі, дачка вучыцца ў Германіі. Што вядома пра новага камандуючага паветранымі сіламі Беларусі
Андрэй Лук’яновіч. Крыніца: belta.by

Старэйшы сын таксама лётчык, а дачка вучыцца ў Германіі

У Лук’яновіч ёсць жонка Святлана. Яна таксама са Смаргоні. У іх два сыны і дачка. Старэйшы сын таксама лётчык грамадзянскай авіяцыі. Ён лётае на пасажырскім Boeіng 747.

Дачка марыла вучыцца ў Оксфардзе. Але пачала вучыцца ў Германіі. Менавіта там яна знаходзілася падчас уварвання расійскіх войскаў ва Украіну. Самога Лук’яновіча ўнеслі ў санкцыйныя спісы Еўрасаюза, Велікабрытаніі, Канады, Швейцарыі і Украіны.

Вёў старонку ў «Одноклассниках» і слухаў Лепса

У Лук’яновіча ёсць старонка ў «Одноклассниках». Сярод упадабаных відэа — фрагмент інтэрв'ю Уладзіміра Пуціна, які крытыкуе ЗША і еўрапейскія краіны. А сярод захаванай музыкі - расійскія выканаўцы Грыгорый Лепс і Леанід Агуцін.