Функцыі галоўнага архітэктара «ўвойдуць у абавязкі» Ганны Сях. Яна стала намесніцай начальніка ўпраўлення будаўніцтва, архітэктуры і горадабудаўніцтва Гродзенскага гарвыканкама, паведаміў «Гродна Плюс».

Спачатку ў паведамленні канала пра прызначэнне было напісана, што ў Гродне з’явіўся галоўны архітэктар, пасля назву пасады ўзялі ў двукоссі, заўважыў канал Urban Hrodna.

Начальнікам упраўлення будаўніцтва, архітэктуры і горадабудаўніцтва Гродзенскага гарвыканкама ў сярэдзіне студзеня 2023 года прызначылі Дзяніса Конана. Да таго ён кіраваў аддзелам добраўпарадкавання ў Гродзенскай гарадской жыллёва-камунальнай гаспадарцы. На сайце гарвыканкама яго прозвішча на гэтай пасадзе дасюль няма.

Пасада галоўнага архітэктара ў Гродне знікла ў 2020 г. Да таго ім была Вольга Барэйка. У 2020 годзе замест аддзела архітэктуры і горадабудаўніцтва стварылі аб’яднанае ўпраўленне будаўніцтва, архітэктуры і горадабудаўніцтва.

У размовах з Hrodna.life гродзенскія архітэктары тады крытычна ацэньвалі гэтую ініцыятыву гарвыканкама. Яны тлумачылі, што проста будаўніцтва і горадабудаўніцтва — розныя сферы дзейнасці, а ў будаўнікоў і архітэктараў, па сутнасці, розныя «мовы» працы. Галоўны архітэктар горада выконваў ролю замоўцы будоўлі ад імя грамадзян. Ён пісаў у агульных рысах, што павінна быць, якога аб’ёму, на падставе якіх дакументаў. Другім замоўцам быў той, хто хоча нешта пабудаваць і мае свае інтарэсы.

Задача галоўнага архітэктара — аб’яднаць творцаў-архітэктараў, інвестараў, будаўнікоў, тлумачыла раней Барэйка. «Вызначыць, дзе эканоміка можа лідзіраваць, а дзе на першым месцы — эстэтыка. Можна сказаць, што галоўны архітэктар — як дырыжор у аркестры».

Сярод абласных цэнтраў асобны галоўны архітэктар горада адсутнічае толькі ў Гродне.