У гандлёвым цэнтры ABC на вуліцы Найдуса 10-гадовы хлопчык скраў з закрытай кропкі продажу электронных цыгарэт чатыры вэйпы. Іх агульная цана — 300 рублёў, паведаміў Telegram-канал «Обратная сторона».
![вэйп, дым](https://dzh7f5h27xx9q.cloudfront.net/wp-content/uploads/2023/09/smoke-2636848_1280-800x533.jpg)
Хлопчык дзейнічаў не адзін. Разам з ім быў яшчэ адзін хлопец, які стаяў на варце. На ўсё ім хапіла некалькіх дзясяткаў секунд: малы зняў частку прылаўка, залез на яго і ўзяў з вітрыны вэйпы. У той вечар маці хлопца была на працы.
«Праблемнага хлопца выхоўвае адна маці. Ён часта прадастаўлены сам сябе. Раней ён ужо скраў восем веласіпедаў», — сказаў афіцыйны прадстаўнік Упраўлення ўнутраных спраў Гродзенскага аблвыканкама Яраслаў Васілеўскі.
![10-гадовы хлопчык абакраў краму ў цэнтры Гродна. Раней ён скраў 8 ровараў](https://dzh7f5h27xx9q.cloudfront.net/wp-content/uploads/2023/09/1694523164photo_2023-09-08_17-58-03-800x497.jpg)
Хлопца накіравалі ў сацыяльную ўстанову
Хлопчыка размясцілі ў сацыяльнай установе. Абставіны ў яго сям'і будзе вывучаць камісія па справах непаўнагадовых. «Маці панясе адказнасць за дзеянні сына не толькі ў адміністрацыйным аспекце, але і ў матэрыяльным плане за скрадзены тавар і пашкоджаную вітрыну», — сказаў Васілеўскі.
Чытайце таксама: Не прададуць у краме — купяць праз Telegram. Як школьнікі ў Гродне набываюць электронныя цыгарэты