Лідскі ДАІшнік спрабуе спагнаць грошы з палітвязня. Лідчаніна асудзілі і збіраюцца звольніць. Пенсіянера Васіля Дземідовіча будуць судзіць сёмы раз. Рэдакцыя Hrodna.life вывучыла, што адбылося ў вобласці з 9 па 15 кастрычніка.
У Гродне ліквідавалі YMCA
Грамадская арганізацыя «Хрысціянскае садружнасць дарослых і маладых» знаходзіцца ў стадыі ліквідацыі. Так вырашыў Гродзенскі абласны суд 4 кастрычніка.
Арганізацыя з’явілася ў Беларусі ў 1995 годзе як частка міжнароднай некамэрцыйнай арганізацыі YMCA. Яна ставіла за мэту ўсебаковае развіццё сяброў арганізацыі і клопат аб іх здаровым ладзе жыцця. Праводзіла фестывалі, лагеры для дзяцей, адукацыйныя курсы. Членаў праўлення арганізацыі назвалі ў рэспубліканскіх СМІ «бчбшнікамі, ятутбайкамі, байсалаўцамі і явыхадзілкамі».
Сілавікі прыйшлі да бацькоў Алеся Зарэмбюка — дырэктара Беларускага дома ў Варшаве
Следчыя крымінальнага вышуку Мастоўскага РАУС наведалі ягоных бацькоў у Мастах. Яны спыталі, ці ведаюць яны, што супраць іх сына ў Беларусі заведзена тры крымінальныя справы. Ім не сказалі, па якіх артыкулах узбуджаныя гэтыя справы. Паліцыянты запыталі польскі нумар Алеся Зарэмбюка, пацікавіліся ягоным асабістым жыццём, пацікавіліся ягонай дзейнасцю і функцыямі ў Беларускім доме ў Варшаве, піша «Гарадзенская праваабарона».
Днямі некалькі чалавек з чырвона-зялёным сьцягам пікетавалі Беларускі дом у Варшаве. Судзячы па фота, гэта прадстаўнікі пралукашэнкаўскай партыі «Фронт», яны перыядычна ездзяць у Беларусь і выдаюць сябе за афіцыйную польскую дэлегацыю.
Уладзіміра Гундара перавялі з калоніі ў крытую турму
Палітвязня Уладзіміра Гундара адправілі з бабруйскай калоніі № 2 у магілёўскую турму закрытага тыпу № 4. Што стала прычынай, пакуль невядома. Адвакату Гундара напрыканцы верасня адмовілі ў сустрэчы. 26 верасня на сустрэчы з турэмным наглядчыкам сваякам сказалі, што з ім усё ў парадку, паведамляе brestspring.org.
З 3 жніўня 2023 года ніякай інфармацыі ад палітвязня не паступала. Сваякі мяркуюць, што ён утрымліваўся ў ШІЗА, адкуль нельга пісаць лісты.
Уладзіміра Гундара прыгаварылі да 20 гадоў калоніі ўзмоцненага рэжыму.
У Гродне палітвязня прысудзілі да 8 гадоў пазбаўлення волі па справе «Чорнай кнігі Беларусі»
У Гродзенскім абласным судзе 9 кастрычніка 35-гадовы палітвязень Аляксандр Юшкевіч быў прыгавораны да васьмі гадоў пазбаўлення волі ва ўмовах узмоцненага рэжыму па справе «Чорнай кнігі Беларусі». Такі прыгавор згодна з ч. 3 арт. 130 КК «Распальванне расавай, нацыянальнай, рэлігійнай або іншай сацыяльнай варожасці або варажнечы» вынес Дзмітрый Бубенчык, паведамляе «Вясна».
Вядома, што Аляксандр быў затрыманы 18 красавіка 2023 года і змешчаны пад варту. Да суда яго пяць месяцаў трымалі ў гродзенскай турме № 1. Усяго па справе адбылося шэсць судовых паседжанняў.
Лідскі ДАІшнік спрабуе спагнаць грошы з палітвязня
Нехвядовіч Павел Іванавіч падаў іск да Камароўскага Аляксея Ігаравіча. Паседжанне аб кампенсацыі маральнай шкоды па справах аб абароне гонару і годнасці прайшло 12 кастрычніка ў судзе Лідскага раёна. Суддзя — Алена Бальцэвіч, паведамляе Telegram-канал «Право имеют».
Даныя Паўла супадаюць са звесткамі супрацоўніка ДАІ ў Лідзе. Аляксей — палітвязень, асуджаны на чатыры гады калоніі.
Медсястру гродзенскага санаторыя «Жамчужына» прысудзілі да «хатняй хіміі» за інтэрнэт-каментар пра міліцыянераў
У судзе Кастрычніцкага раёна Гродна 25 верасня асудзілі Вольгу Куранчык па арт. 369 КК «Знявага прадстаўніка ўлады». Суддзя Віталь Лабоцкі прызначыў Вользе абмежаванне волі без накіравання ў папраўчую ўстанову адкрытага тыпу («хатнюю хімію»), а таксама штраф, паведамляе «Вясна».
Вольгу абвінавацілі ў тым, што яна, паглядзеўшы ў Telegram-канале «Беларусь головного мозга» два відэаролікі аб супрацоўніках міліцыі, пакінула каментары, якія суд палічыў абразлівымі. Каментары тычыліся маёра міліцыі, старшага ўчастковага інспектара і маёра міліцыі, участковага інспектара Жодзінскага ГАУС. Вольга поўнасцю прызнала віну.
Жанчыне змянілі меру ўтрымання з узяцця пад варту на падпіску аб нявыездзе і вызвалілі ў зале суда.
Вольга Куранчык мае сярэдне-спецыяльную адукацыю, працавала медсястрой у санаторыі «Жамчужына», мае на ўтрыманні непаўналетняга дзіцяці.
Новыя «экстрэмісты»
Нагула Жанна Генадзеўна, Кленіцкая Лізавета Сяргееўна, Кленіцкі Дзмітрый Ігаравіч з Зэльвы 13 кастрычніка папоўнілі спіс экстрэмістаў. Іх судзімасць не пагашана.
Лідчаніна асудзілі і збіраюцца звольніць
Юрыя Мечыслававіча Авіжыча падвергнулі адміністрацыйнаму арышту ў 15 сутак. Стаіць пытанне аб яго звальненні, паведамляе Telegram-канал «Задержания, суды в Лиде».
У 2021 годзе Юрыю Авіжычу ўручылі падзячны ліст і падарункавы сертыфікат ад Лідскай раённай арганізацыі рэспубліканскага грамадскага аб’яднання «Белая Русь».
Затрыманні ў Слоніме
12 кастрычніка АМАП затрымаў у Слоніме Руслана і Цімура Лагуціка. Прычына затрымання высвятляецца, паведамляе Telegram-канал «Суды, задержания. Гродно и область».
Верагодна, гэта дальнабойшчык-блогер з YouTube-каналам Engine BLR. На канал падпісана амаль 30 000 чалавек. Цімур, верагодна, брат Руслана, паведамляе «Белсат».
Пенсіянера Васіля Дземідовіча будуць судзіць сёмы раз
19 кастрычніка ў Старых Дарогах пачнецца суд над 71-гадовым палітвязнем Васілём Дземідовічам. Яму прад’яўлена абвінавачанне па арт. 369 КК «Абраза прадстаўніка ўлады і арт. 368 КК «Абраза Прэзідэнта Рэспублікі Беларусь». Справу разгледзіць судзьдзя Натальля Зык, паведамляе «Вясна».
Гэта ўжо сёмы суд над пенсіянерам. У агульнай складанасці яго прыгаварылі да 7 гадоў пазбаўлення волі, пры гэтым вынік двух апошніх судовых працэсаў пакуль невядомы. Васіль Іванавіч знаходзіцца ў турме амаль год і чатыры месяцы.
Гродзенскі суд прызнаў экстрэмісцкай электронную пошту
Суд Ленінскага раёна Гродна 10 кастрычніка прызнаў экстрэмісцкай інфармацыяй электронную пошту [email protected]. Гэта пошта рэгіянальнага праекта «Волковыск.BY». Раней яго прызналі экстрэмісцкім фарміраваннем.
Праўладны Саюз палякаў звярнуўся да грамадзян Польшчы перад выбарамі: у лісце так шмат памылак, што Google Translate пераклаў бы лепш
Лаяльны рэжыму Лукашэнкі Саюз палякаў Беларусі напярэдадні парламенцкіх выбараў і рэферэндуму ў Польшчы звярнуўся да польскіх грамадзян. Адкрыты ліст ад Гродзенскага гарадскога аддзялення ГА «Саюз палякаў на Беларусі» апублікавала прапагандысцкая газета «Гродзенская праўда». У лісце лукашэнкаўскія «палякі» заклікаюць галасаваць у рэферэндуме за дэмантаж агароджы на беларуска-польскай мяжы. Яе пабудавалі ў 2022 годзе як адказ на міграцыйны крызіс на мяжы Еўрасаюза, справакаваны ўладамі Беларусі і Расіі.
З Балгарыі выслалі праваслаўнага святара, які раней служыў у Гродне
Праваслаўнага святара Яўгена Павельчука, які раней служыў у гродзенскім Свята-Пакроўскім кафедральным саборы, вызвалілі з пасады і выслалі з Балгарыі. У Гродне ён быў вядомы тым, што ствараў вайскова-патрыятычныя клубы для падлеткаў.
У каледж мастацтваў на БЛК прыходзілі сілавікі
У Гродзенскі дзяржаўны каледж мастацтваў раніцай 11 кастрычніка 2023 года прыйшлі сілавікі. Супрацоўнікаў выклікалі на размовы, людзі тэрмінова вычышчалі тэлефоны. Некаторых супрацоўнікаў каледжа выклікалі на размову з сілавікамі ў цывільным да кіраўніцтва ўстановы. У мабільных тэлефонах супрацоўнікаў шукалі «няправільныя» падпіскі. Таксама да сілавікоў выклікалі некаторых студэнтаў каледжа.
«Сама выява крыжа — „сцена насилия и вражды“». Чаму іконы, якія знялі ў Гродне, не павінны выклікаць «положительные эмоции»
Тлумачэнні, што сцэны гвалту ў царкве не павінны псаваць людзям настрой, абсалютна недарэчныя. Бо хрысціянства — гэта рэлігія пакутнікаў, гэта вера ў Бога, якога закатаваў несправядлівы суд. Так палітолаг і багаслоў Наталля Васілевіч па просьбе Hrodna.life пракаментавала апраўданні гродзенскіх уладаў, чаму яны прыбралі дзве іконы новапакутнікаў са Свята-Пакроўскага сабора ў Гродне.
Дзяніса Швыркіна пахавалі ў Гродне
Памерлага ў эміграцыі Дзяніса Швыркіна 12 кастрычніка пахавалі на радзіме ў Гродне. У пачатку кастрычніка яму правялі ўскрыццё. Ён памёр 23 верасня праз праблемы з сэрцам. 42-гадовы Дзяніс памёр у эміграцыі, у якую выехаў пасля затрымання ў верасні 2023 года за распаўсюджванне экстрэмісцкіх матэрыялаў. У мужчыны засталася жонка і дачка.
У беларусаў з ВНЖ іншай краіны пытаюцца пра пастаноўку яго на ўлік
На беларускай мяжы пагранічнікі на выездзе пачалі правяраць пастаноўку на ўлік у МУС віду на жыхарства або пашпарты іншай краіны. Пра гэта паведамілі адразу некалькі чалавек у адным з чатаў. Такі закон прынялі летам — у сярэдзіне кастрычніка заканчваюцца тэрміны, у якія беларусы былі абавязаны паведаміць аб існуючых замежных дакументах.
У Гродне скончыў жыццё самагубствам былы палітвязень
Палітвязень з Гродна Кірыл Шчаглоў скончыў жыццё самагубствам у лютым 2023 года. Ён ужо знаходзіўся на волі. Хлопцу было 19 год. 18-гадовы Кірыл Шчаглоў быў асуджаны па артыкуле 368 КК «Абраза Прэзідэнта Рэспублікі Беларусь». Яго прыгаварылі да паўтара года «хатняй хіміі».
У ваўкавыскую калонію шукаюць адразу трох лекараў - уключаючы начальніка. Зняволеныя не атрымаюць дапамогу
У папраўчую калонію № 11 у Ваўкавыску шукаюць трох лекараў. Таксама адкрыта вакансія начальніка медыцынскай часці. Інфармацыю аб гэтым Hrodna.life знайшоў на сайце Дзяржаўнай службы занятасці. Праваабаронца лічыць, што гэта сур’ёзны недахоп, які стварае складаную сітуацыю для зняволеных.
