У Пеляскай школе. Фота: сацсеткі школы.
У літоўскіх школах Беларусі ў Пелясе і Рымдзюнах з верасня 2022 года знікне літоўская мова выкладання. Замест яе ўрокі будуць весці толькі на рускай і беларускай, паведамляе BNS.
«Ад беларускага боку паступіла паведамленне, што з 1 верасня ўсе школы для нацыянальных меншасцяў павінны выбіраць мову навучання — рускую ці беларускую», — сказаў BNS намеснік міністра замежных спраў Эгідыюс Мейлунас. Літоўская мова застанецца толькі прадметам.
«Зачыняючы школы, мы абмежавалі б любую магчымасць для суайчыннікаў развіваць сваю родную мову, таму мы гаворым і шукаем магчымасці захаваць магчымасць вучыцца на літоўскай мове», — сказаў ён.
Літоўскія чыноўнікі лічаць рашэнне скасавання літоўскай мовы ў школах непрымальным і хочуць дамагчыся хаця б пераходнага перыяду.
«МЗС апавясціла беларускі бок аб непрымальнасці такога рашэння, бо яно парушае двухбаковыя дамоўленасці і абмяжоўвае права беларускіх літоўцаў на навучанне на роднай мове», — сказаў прадстаўнік міністра.
«У любым выпадку мы будзем імкнуцца стварыць магчымасці для нашых суайчыннікаў вывучыць літоўскую мову і лепш вывучыць Літву», — сказаў прэс-сакратар міністра адукацыі Дайнарас Лукас.
Пеляса — вёска ў Воранаўскім раёне (Больцішскі сельсавет). У пеляскай школе дзеці вывучаюць чатыры мовы: літоўскую, рускую, беларускую, замежная — англійская. У школе вучацца дзеці з Воранаўскага і Лідскага раёнаў і Ліды. Пры школе ёсць інтэрнат на 30 месцаў, дзе ў час вучэбнага тыдня жывуць дзеці з аддаленых мясцовасцяў. З блізкіх вёсак школьнікаў штодня падвозяць двума аўтобусамі. Харчаванне навучэнцаў школы бясплатнае. У Пеляскай школе — 127 вучняў і 23 настаўнікі, 11 з якіх з’яўляюцца грамадзянамі Літвы.
Рымдзюны — аграгарадок у Астравецкім раёне Гервяцкага сельсавету. У Рымдзюнскай школе — 82 вучні і 18 настаўнікаў, 14 з іх — грамадзяне Літвы.
Паводле звестак Міністэрства адукацыі, навукі і спорту Літвы, рымдзюнская школа, пабудаваная ў 1996 годзе на літоўскія сродкі, утрымліваецца за кошт Беларусі. Пеляскую школу фінансуе Літва. Міністэрства адукацыі, навукі і спорту разглядае пытанне спынення фінансавання.
У гродзенскай і ваўкавыскай польскіх школах з верасня 2022 года пачнуць выкладаць на рускай мове. Пра гэта бацькам паведамілі у пачатку красавіка, спаслаўшыся на змены ў Кодэксе аб адукацыі. У гродзенскай польскай школе № 36 польскай мовы і літаратуры пакінуць па адной гадзіне на тыдзень. Па-беларуску будуць выкладаць не толькі гісторыю Беларусі і частку прадмета «Чалавек і свет». «Ствараюцца ўмовы, каб усё, што звязана з польскім, загінула», — сказала Hrodna.life маці аднаго з навучэнцаў.
Чытайце таксама:
Фірму-уладальніка крамы "АвтоЗапчасти" ў Гродне, ТАА "Рукша", зноў хочуць збанкруціць. Банкруцтва хочуць прызнаць праз эканамічны…
Два новенькія электрычныя пікапы Tesla Cybertruck 2023 года выпуску затрымалі літоўскія мытнікі 7 мая ў…
Будынак запраўкі “Газпрамнафты”, а таксама матэль і кафэ ля самай беларуска-літоўскай мяжы прадаюць з аўкцыёну.…
"Каманду Латушкі і Рух "За Свабоду" 8 траўня прызналі экстрэмісцкім фармаваннем. У ліку адказных за…
Праўладная актывістка Вольга Бондарава ў сваім допісе назвала нявестку Аляксандра Лукашэнкі “змагаркай”. Але пазней адрэдагавала…
Загадчыца аднаго з інтэрнатаў у Гродне не ўсачыла за тым, каб паддоны электраплітаў на кухні…