Мясцовы дабрачынны фонд «Паўночныя Афіны М. К. Агінскага» і Грамадскае аб’яднанне ветэранаў-аднапалчан, удзельнікаў баёў за Гродна ў 1941−1944 гадах ліквідуюць праз Гродзенскі абласны суд. Стваральнікі фонду планавалі адрадзіць сядзібу Агінскага і зрабіць Залессе культурным цэнтрам.

Пасяджэнні аб ліквідацыі фонду пачаліся 15 жніўня. Суддзя ў анлайн-раскладзе суду не быў паказаны. Ініцыятарам ліквідацыі з’яўляецца адзін са стваральнікаў фонду — Смаргонскі гісторыка-краязнаўчы музей. Акрамя музея, заснавальнікамі з’яўляюцца Мінскі сталічны саюз прадпрымальнікаў і працадаўцаў і Маладзечанскае дзяржаўнае музычнае вучылішча імя М. К. Агінскага.

Фонд працуе з 2010 года. У планах фонду была рэстаўрацыя ансамбля былога палаца Агінскіх пачатку ХІХ стагоддзя ў Залессі, прыцягненне інвестыцый у Смаргонскі раён і развіццё яго культурнага і эканамічнага патэнцыялу.

У самім палацы рэстаўрацыя прайшла ў 2011−2014 гг., за апошнія гады ён стаў папулярным турыстычным напрамкам. Работы на тэрыторыі сядзібы — аднаўленне іншых будынкаў, вадаёма — працягваліся і ў наступныя гады. Фінансаваў аб’ект у тым ліку і Еўрасаюз у рамках трансгранічных праграм.

Фонд арганізоўваў у сядзібе балі, пленэры, валанцёрскія работы па ачыстцы парку, праводзіў семінары.

Паўночныя Афіны — гістарычная назва сядзібы Агінскага, якая ў XIX стагоддзі была культурным цэнтрам рэгіёна.

Чытайце таксама: Грошай ад Еўрасаюза не будзе. Што чакае найбуйнейшы маёнтак ВКЛ пад Навагрудкам пасля ліквідацыі фонду, які яго ратаваў

Ліквідацыя аб’яднання ветэранаў

Суд аб ліквідацыі аб’яднання ветэранаў адбудзецца 19 жніўня. Суддзя — Сяргей Піпко. Заяўнік па ліквідацыі аб’яднання — Галоўнае ўпраўленне юстыцыі Гродзенскага аблвыканкама.

Аб’яднанне ветэранаў-аднапалчан існуе з 1995 года. Аб дзейнасці арганізацыі ў інтэрнэце інфармацыі няшмат. Напрыклад, у 2006 годзе арганізацыя ўдзельнічала ў падрыхтоўцы і правядзенні візіту польскіх ветэранаў у Гродне на 9 траўня. У тым жа 2006-м ветэраны з гэтай арганізацыі сустракаліся са студэнтамі гродзенскіх ВНУ, ездзілі з імі на Лінію Сталіна.


За апошнія паўгода ў Гродне ліквідавалі:

  • Гродзенскае грамадскае сямейнае аб’яднанне «Парадыгма»,
  • Гродзенскае абласное грамадскае аб’яднанне «Чатыры вятры»,
  • Дзіцяча-юнацкае грамадскае аб’яднанне «Спартыўна-творчая студыя ФАЕР»,
  • Грамадскае аб’яднанне «Байцоўскі клуб «Чорная пазнака»,
  • Абласны спартыўна-патрыятычны клуб «Гонар Радзімы»,
  • Гродзенскае абласное грамадскае аб’яднанне былых малалетніх вязняў фашысцкіх канцлагераў,
  • «Краязнаўчае таварыства — Коматава»,
  • «Устойлівае развіццё вёскі».

У пачатку жніўня пачаліся суды аб ліквідацыі мясцовага дабрачыннага фонду «Наша Карэліччына».

Яшчэ каля 20 арганізацый ліквідавалі з лета 2021 года. Многія арганізацыі не былі звязаны з палітыкай, а займаліся настольнымі гульнямі, развіццём спорту і інфраструктуры, адукацыяй. Некамерцыйныя арганізацыі, што засталіся, абяцалі пасартаваць па ступені «фінансавання тэрарызму».